Akeanon news: Kalibo Ati-atihan Product Showcase, kumita it P1.0638 M

Akeanon news: Kalibo Ati-atihan Product Showcase, kumita it P1.0638 M

By Venus G. Villanueva, Thursday 31st of January 2013

KALIBO, Aklan, Enero 31 (PIA6) -- Ro ginhiwat nga sang dominggo nga Kalibo Ati-atihan Product Showcase sa Pastrana Park bilang sambilog sa mga mayor nga atraksyon it Kalibo Sto. Nino Ati-atihan Festival halin ku Enero 14 hasta 21, 2013 hay kumita it P1.0638 milyon, suno sa Department of Trade and Industry (DTI) – Aklan.

Ro product showcase hay ginpakigsakupan it 28 nga mga Micro, Small and Medium Enterprises (MSMEs).

Suno kay DTI-Aklan Provincial Director Diosdado P. Cadena Jr., bisan nagnaba ro kita it 28% sa gina target kumpara sa ginkita ku nagtaliwan nga dag-on, 6 man nga mga MSMEs sa health and wellness ag sa indigenous fibers ro nakabuoe it booked orders.

Ginsugid man it DTI nga bangud sa product showcase, 12 nga "market linkages" ro ha establisar sa mga lokal nga mga manugbaligya sa Roxas, Iloilo, Manila ag sambliog nga hotel sa Boracay para sa herbal soap, ginger ag lemon tea, nga hinaboe nga inugsoksok, ag mga produktong himo sa "clay".

Ro mga sample ku rayang mga produkto hay gindaea nanda sa andang mga baealigyaan sa Manila ag iba pa agud ma testingan kon raya hay mabakae idto.

Kapareho man ku nagtaliwan nga dinag-on, ro product showcase hay ginpangunahan it Hugod Aklanon Producers Association, DTI-Aklan, gobyerno municipal it Kalibo ag Kalibo Sto. Nino Ati-atihan Foundation.

Gintambungan ro pagbukas it product showcase nanday DTI USEC Merly Cruz, DOT6 Regional Director Helen Catalbas, Kalibo mayor William S. Lachica, Vicky Ramos-Antonino, Provincial Tourism Council Chairperson, DTI Regional Director Dominic Abad ag abu pa.

Ginpakita sa nasambit nga product showcase ro mga eambong ag tela nga himo sa pina ag iba pang ‘indigenous’ fibers, mga pangregalo ag gamit sa baeay, mga gin proseso nga pagkaon, mga baligya sa ikamayad it eawas ag mga tanum. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.