Aklanon News: Aklan product expo sa Iloilo nagkita it P3.581 milyones

Sunday, November 13, 2011

Aklanon News: Aklan product expo sa Iloilo nagkita it P3.581 milyones

ni Venus G. Villanueva

KALIBO, Aklan, Nobyembre 13 (PIA) -- Ro pagpasundayag it pinakamayad-ayad nga mga produkto it mga Micro, Small and Medium Enterprises (MSMES) it probinsya it Aklan nga ginhiwat kurundaya eamang sa The Event Center sa SM City Iloilo hay nagkita it P3.851 milyones.

Gintawag nga Aklan Product Expo 2011, ro aktibidad hay ginkaeabuligan it Department of Trade and Industry, Gobyerno Probinsyal it Aklan ag Hugod Aklanon Producers Association, Incorporated.

Ro pagbaligya ag pagpasundayag it mga produkto it Aklan hay dag-unan nga ginahiwat sa nasambit nga lugar sa tuyo nga ikapakita ro mga pinakamayad-ayad nga produkto it Aklan, ag magtueod sa mga MSMEs nga maghimo it mga bag-o nga produkto nga pwede ikasukoe sa iba.

Suno kay DTI-Aklan Provincial Director Diosdado P. Cadena, Jr., nagtaas sa dag-on ngara ro kinita it mga MSMEs it 16%, kumpara sa kinita ro nagtaliwan nga dag-on nga P3.3256 million.

Suno pa gid sa DTI, ro mga exhibitor nga abu it kinita idto sa Iloilo hay rong halin sa Agri and Aquabased- processed food sector, nga ginpangunahan it Bread and Butter Food Industries; Indigenous Fibers and Crafts, paagi sa Sutoniel’s Piña Cloth and Native Handicrafts; ag Gifts, Housewares and Furnishing Sector, nga ginpangunahan man it Jojo’s Christmas Cottage.

Paagi man sa ginhiwat nga showcase, naka establisar ro mga MSMEs it 17 nga mga koneksyon sa mga grocery stores, specialty shops, boutiques ag mga pasalubong centers sa Iloilo ag kaeapit nga probinsya.

Ginpakigsakupan ro expo it 29 nga mga MSMEs it Aklan.

Sanday Governor Carlito Marquez ag Vice Governor Gabrielle Calizo, sa pag representar nanday Engr. Roger M. Esto ag SK Federation President Bob Augusto Legaspi, hay nagpaabot it mensahe nahanungod sa aktibidad sa ginhiwat nga pagbukas it product expo. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.