Aklanon News: Kalibo makaangkon it primera klaseng matansahan

Aklanon News: Kalibo makaangkon it primera klaseng matansahan

By Venus G. Villanueva, Wednesday 2nd of May 2012

KALIBO, Aklan, May 2 (PIA6) -- Nagapahaum eon makaron ro gobyerno lokal it Kalibo it mga kinahangeanon nga mga butang agud ikapatindog sa banwa ngara ro sangka primero-klase nga matansahan.

Suno kay Ron Bautista, Information Officer it Kalibo, ro tikang ngara hay ginpangunahan it Department of Agriculture (DA) paagi kay Sec. Proceso Alcala nga nagpadaea it anang empleyado iya sa pagtan-aw it lugar nga butangan it matansahan.

Imaw man, ginsugid ni Bautista nga may sangka representante man it sangka ahensya it United Nations paagi sa Department of Trade and Industry (DTI) nga nag-adto man kay Mayor William Lachica it Kalibo nga nagsugid kana nga hapilian ro Kalibo bilang resipyente it rayang proyekto.

Bangud kara, ginapahaum eon it Municipal Planning and Development Office (MPDO) ro mga papeles nga kinahangeanon nga iga sumiter ag iga review it DTI.

Ginpaabot rayang balita sa ginhiwat nga Orientation/Seminar sa Meat Hygiene, Welfare on Food Animals and its Pertinent Laws for Meat Traders, vendors, Butchers and Aides nga ginhiwat sa 3rd Floor it Municipal Building it Kalibo.

Ro pag-angkon its Double “A” kon bukon man it Triple “A” nga matansahan hay mabuhay eon nga handum it Kalibo bangud raya ro kabisera it Aklan ag sa tindahan kara ginabakae ro mga supply it pagkaon paadto sa Boracay ag iba pang mga banwa.

Sa parte it Provincial Local Price Coordinating Council (PLPCC), ro pag-angkon it Kalibo it primera klase nga matansahan hay mabuhay eon kara nga ginaduso agud masiguro nga ro mga karne ag mga produkto kara nga ginabaligya ag ginaproseso nga gina baligya sa tindahan hay siguradong malimpyo ag euwas kaunon.

Ginapamunuan ro PLPCC ni Governor Carlito Marquez bilang Chairperson samtang ro Vice Chairperson kara hay si DTI Provincial Director Diosdado P. Cadena Jr. ro Vice Chairperson. (JSC/VGV-PIA 6 Aklan)

Cabatuan.com - Kasimanwa.com - Diosdado Cadena Jr.