Aklanon news: Investment Conference pagahiwaton sa Aklan

Aklanon news: Investment Conference pagahiwaton sa Aklan

By Venus G. Villanueva, Thursday 21st of March 2013

KALIBO, Aklan, Marso 21 (PIA) -- Sangka Investment Conference (ICON) ro pagahiwaton sa Aklan sa Abril 26 sa pagpahisayud sa tanan nga haum eon nga mayad ro probinsya nga magbaton it mga “investors”.

Rayang aktibidad nga pagapamunuan it Department of Trade and Industry (DTI) hay pinaka-una nga pagahiwaton sa probinsya ag sa Rehiyon 6, suno kay DTI-Aklan Provincial Director Diosdado P. Cadena, Jr.

Ginhambae man ni Cadena nga rayang aktibidad hay hugot nga ginduso ni DTI Undersecretary Merly Cruz, bangud sa pagpati nana nga mabahoe nga baealigyaan it mga produktong halin mismo sa Aklan ro isla it Boracay.

Ginaeauman nga mag-atender sa ICON sanday DTI Secretary Gregory Domingo ag DTI Undersecretary Merly Cruz, nga magapaabot it Keynote Address ag maga presentar it konsepto it aktibidad.

Sambilog sa ginaeauman nga ipresentar ni Cruz, suno kay Cadena, hay ro pag paeagku it pangasius sa Aklan kon siin ginatan-aw kara nga una-una nga pagabaligyaan hay rong mga establisimiento sa isla it Boracay.

Ro pangasius hay sangka klase it isda sa tab-ang nga ro itsura hay gineakot nga bangeus ag pantat.

Posible nga makapaeagku it pangasius sa sangka tangke nga nagasukat it 1,000 hasta 1,200 metros kwadrado.

Ro pagpaeagku kara sa Aklan, suno kay Cadena, hay pagpakita nga naila ro mga Akeanon nga makaagum it “inclusive growth” nga ginahambae ni Presidente Aquino ag makaparte sa mga bentaha nga una sa isla it Boracay.

May ginapaabot nga mga 200 nga mga pumaeasakop nga maga-atender sa ICON nga mga posibleng magnegosyo sa Aklan, samtang paga imbitahon man ro mga Regional Director it DTI, Department of Agriculture ag Fiber Industry and Development Authority halin sa sari-saring rehiyon it nasyon.

May magapaabot man it mga “testimonials” nahanungod sa pagpaeagku it mga pangasius.

Euwas sa pangasius, maga sentro man ro ICON sa mga produktong abaca, ag produksyon it karne ag mga tinuean-on. (JSC/VGV-PIA6 Aklan)

Cabatuan.com - Kasimanwa.com - Diosdado Cadena Jr.