International flights gikan sa Hong Kong via Cebu Pacific airlines magahugpa sa Cabatuan Airport sa katapusan nga simana sang Oktubre ukon sa nahauna nga simana sang Nobyembre karon nga tuig
Hiligaynon News: Akreditado nga mga tour operators
nagtambong tour packaging seminar

Cabatuan, Iloilo, Philippines
By Vicente W. Villavert, Friday 22nd of June 2012

SYUDAD SANG ILOILO, Hunyo 22 (PIA6) -- Anum (6) ka mga Tour Operators sa Western Visayas nga akreditado (accredited) ukon ginapahanugutan sang Department of Tourism (DOT) ang nagtambong sang isa ka adlaw tour packaging conference sang Biyernes sa pagpanhanda na sa nahauna nga pag-abot sang international flights nga magagikan sa Hong Kong via Cebu Pacific airlines kag magahugpa sa Iloilo Airport of international standards sa katapusan nga simana sang Oktubre ukon sa nahauna nga simana sang Nobyembre karon nga tuig.

“May ara kita sobra 100 ka mga tour operators sa rehiyon nga lisensyado sang mga pangulohan local ( Local Government Units), apang anum (6) lamang ka mga tour operators ang nakapasar sa DOT accreditation standards,” pahayag ni DOT 6 OIC-Director Helen J. Catalbas sa SPIA interview.

Sa ginhiwat nga konperensya sa talatapan sang DOT, Iloilo City, ang mga tour operators upod sa mga hotel operators nagtalakay sang mga bagay angut sa "tour packages" agud nga magmangin matalunsay kag maayo ang serbisyo ang mapatigayon nga makaganyat dugang sang mga turista sa pagbisita sa Western Visayas kag himuon na nga mangin regular nga destinasyon.

Ang pagtililipon sang mga tour operators isa ka importante gid importante nga bagay bangud nga ang ini nga sekto may dako nga papel sa pagganyat sa mga turista pinaagi sa ila packaged nga pagbisita sa mga matahum nga mga lugar.

“Madamo sang mga foreign tourists bisan ang mga lokal nga mga turista ang nakahibalo na sang mga matahum kag makawiwili nga mga lugar kag talan-awon sa rehiyon, gani nga kinahanglanon gid ang makipag-angut sa mga tour operators agod mapabaskug ang aton industriya sa turismo santu sa kampanya ni Presidente Aquino sa pagpaluntad sang maayo nga imahen sang Pilipinas nga destinasyon sang mga turista sa Asya,” hambal ni Catalbas.

Gindugang ni Catalbas a pagsiling nga sang nagligad nga tuig ang rehiyon may 2.4 million ka mga turista kag 509,000 sini diri ang mga foreign tourists kag 1.8 million ang mga lokal nga mga turista.

Ang sa bahin sang pagbukas sang international flights sa Iloilo Airport, ginsiling ni Catalbas nga “ini isa ka regular passenger flights gikan sa Hong Kong kag Singapore kag vice versa”.

Ang Iloilo to Hong Kong flight pagapatigayunon apat ka beses kada semana samtang tatlo ka beses naman ang para sa Singapore.

“Halimbawa, kon ang destinasyon sang eroplano Iloilo-Hong Kong-Iloilo route, pagkasunod nga adlaw mangin Iloilo-Singapore-Iloilo naman nga ruta,” pabutyag ni Catalbas samtang iya ginpaathag nga ang flight schedules himuon sa kagab-ihon, kag temprano pa sa kaagahon agod nga ini indi makaapekto sa nagaluntad na nga mga domestic flight schedules sa airport.

Sa ginhiwat nga press conference, ginhinambit man ni Catalbas ang pagkabalaka ni Senator Franklin M. Drilon’s bahin sa kon paano mangin tayuyon ang international flights banghud nga basi mag-untat ang pagbiyahe sang mga eroplano kon wala ukon talagsahon na lang ang mga pasahero.

Nagalaum si Catalbas bangud nga kon may yara na nga international flights, magabukas man ang bag-o nga mga domestic routes kag ini magabukas sa Iloilo airport para sa bilog nga kalibutan bangud nga ang mga tao sa iban nga mga pungsod magapanakayon via Singapore ukon Hongkong pinaagi sa "connecting flights" pakadto naman diri sa Iloilo, kag amo man ang sa bahin sang mga Filipino sa kaiping nga mga lugar, probinsya ukon rehiyon magakadto sa Iloilo para sa ila pagpanakayon gamit ang aton Iloilo airport.

Ang pagpalapnag lamang sang impormasyon bahin sa sining bag-o nga mode of transportation diri kag sa luas sang pungsod ang kinahanglanon para maengganyo ang aton mga seafarers kag overseas Filipino workers nga gamiton ang aton Iloilo Airport pakadto sa Hong Kong ukon pa-Singapore.

Nagalaum man si Catalbas nga pinaagi sa international flights, magabulig pahapos sang pagbukas sang Puerto Princesa Palawan route pa-Iloilo.(JSC/VWV-PIA 6 Iloilo)

(Bookmark this page for future reference)

CABATUAN AIRPORT
Cabatuan.com - Timeline 2012
Cabatuan.com