Iloilo PDRRMC report nagapakita nga naapektuhan ang Cabatuan kang Bagyo Quinta Hiligaynon news: Bagyo 'Quinta' nakaapekto sa linibo ka mga pamilya kag kataohan sa Iloilo Cabatuan, Iloilo, Philippines By Vicente W. Villavert, Friday 28th of December 2012 SYUDAD SANG ILOILO, Dis. 28 (PIA6) -- May kadamuon sang 2,531 ka mga pamilya kag 2111 ka kataohan sa nanuhaytuhay nga munisipalidad sang probinsya sang Iloilo ang naapektuhan sang baha nga gintuga sang mamunog nga ulan nga dala ni Bagyo Quinta. Ginpabutyag sang Iloilo Provincial Disaster Risk Reduction and Management Council (PDRRMC) nga padayon nga gina consolidate ang damage report sang mga natungdan nga pangulohan lokal. “Bayntidos ( 22) ka mga munisipalidad ang nakasumiti sang typhoon damage report, kag nagalaum pa kita nga magasulod pa ang iban nga mga reports nagikan sa iban pa nga mga kabanwahanan sang probinsya nga naapektahan sang bagyo,” hambal Provincial Administrator Raul Banias sa intergview sang PIA. Ang mga apektado nga pamilya kag kataohan gin-evacuate sa mga nanuhaytuhay nga mga evacuation centers sang mga natungdan nga mga Municipal Disaster Risk Reduction and Management Council. Suno kay Banias gintagaan na sang instruksyon ang engineering department sang probinsya nga magbulig sa pangulohan lokal sang Calinog sa pagkay-o sang naguba nga Cabaguiao Bridge, kag “nagalaum kami nga makabaton sang dugang nga report bahin sa mga kahalitan sa sektor sang agrikultura kag sa mga pasilidad pang imprastraktura. “Nagapamakal kami sang kinarton nga pagkaon katulad sang sardinas, bugas, biskwit, tinapay, tubig, bugaskag madamo pa nga iban para sa relief assistance sa mga naapektahan nga mga tao,” hambal ni Banias. Ang munisipalidad sang Janiuay, nga nagreport sang 2,027 ka mga tao kag 405 ka mga pamilya nga naapektahan sang bagyo, gindeklarar nga ‘under state of calamity’. Ang nahinambitan nga munisipalidad nag report man sang 22 ka nagkalaguba nga balay; 282 ang partially damaged houses; kag isa ang napatay bangud sang pagkalumos. Duha pa ka iban ang ginkuha ni Quinta nga nagikan sa mga munisipalidad sang Lambunao kag Barotac Nuevo. “Bisan pa nga nag-untat na ang ulan, may mga pagtaas pa sang tubig baha sa mga manubo nga bahin sang mga kabanwahanan sang Dumangas, Zarraga kag bahin sang Leganes kag Pototan, “hambal ni Banias samtang iya nga ginpaalinton nga sa instruksyon ni Governor Arthur Defenspor kag OIC Governor Richard Garin, “amon na-deploy ang amon mga dump trucks kaupod sang mga rescue team agud madugangan ang mga pwersa para sa mga evacuation activities”. Ang Iloilo PDRRMC report nagapakita nga ang mga naapektahan nga mga munisipalidad ginalakipan sang Alimodian, San Miguel, Zarraga, Janiuay, Lambunao, Mina, Calinog, Cabatuan,Pototan, Bingawan, Duenas, Ajuy, Barotac Nuevo, Anilao, Passi City, Dingle, Dumangas, San Enrique, Balasan, San Rafael, Concepcion, Barotac Viejo. “Amon ginapadayon ang pagmonitor kag padala sang mga salakyan para sa rescue kag relief operations,” dugang nga pahayag ni Banias samtang iya gin paalinton nga naghiwat sang conperensya ang Iloilo PDRRMC para ma-consolidate ang typhoon damage report, kag matambungan ang mga kinahanglanon nga sulosyon para makarecover sa gilayon ang mga naapektuhan nga pangulohan lokal.(JSC/VWV-PIA6 Iloilo) Cabatuan.com - Timeline 2012 Cabatuan.com